ရခိုင်တေးရွီးဆရာ ဂီတစာဆို ဦးထွန်းအောင်သာနဲ့ အမိန်းအဖြေ ဗဂျီးကျော် (စစ်တွေ)

နာမေ = ဦးထွန်းအောင်သာ
အသက် = ၅၄ နှစ်
အလုပ်အကိုင် = စစ်တွေတက္ကသိုလ်ဝန်ထမ်း
ဂီတတီးခတ်မှု = မယ်ဒလင်၊ တယော၊ ပတ္တလား
လိပ်စာ = စက ၄၆၃၊ စစ်ကဲလမ်း၊ ရွာကြီးမြောက်၊ စစ်တွေမြို့။

ဆရာ့ဇာတိမွီးရပ်မြီကို ပြောပြပါ။
ကျောင်းတက်လမ်းရပ်ကွက်၊ စစ်တွေမြို့။

တေးဂီတနယ်ကို စတင်ဝင်ရောက်ခရေနှစ်၊ ပထမဆုံးရွီးရေတေးခြင်းနာမေနဲ့ သီဆိုသူကို သိချင်ပါရေ။
၁၉၇၃ခုနှစ်၊ ဇူလိုင် ၁၃ရက်နိမှာ ``သဇင်ဆင်လို့ သခင်ကြင်လီဗျာ´´တေးခြင်းနဲ့ ဂီတနယ်ကို စတင်ဝင်ရောက်ခပါရေ။ သီဆိုသူက မောင်ထွန်းသိန်း (အငြိမ်းစား-သစ်တော) ဖြစ်ပါရေ။

အဂုထိ ရခိုင်တေးခြင်းဇာနှစ်ပုဒ် ရွီးဖြစ်ပါဗျာလ်လေ။ မိုနိုက ဇာလောက်၊ စတီရီယိုက ဇာလောက် ဟိပါလေ။ ဆိုရေလူတိကိုလေ့ ပြောပြပါ။
တေးခြင်းအရွီအတွက်ကို အတိအကျမမှတ်မိပါဗျာလ်။ ခန့်မှန်းခြီ ၁၀၀လောက်တော့ခါ ဟိဖို့ထင်ပါရေ။ ကျွန်တော် ရွီးစွာတိကို ဦးမောင်သိန်း၊ မြတ်ထွဏ်းခိုင်၊ မောင်ကိုကို၊ ညှာစိမ်းခိုင်၊ ရမ္မာဝတီစံဝင်း၊ သန်းထွန်းအေး၊ ဘုန်းမြတ်ကောင်း၊ မြတ်ခိုင်ကျော်၊ စန္ဒာသန်း၊ စန်းလွင်၊ ကိုကျော်သာ၊ မသန်းရီ၊ ကိုအောင်သာကျော် (ဆီးရုံ) ရို့ ဆိုခကတ်ပါရေ။

ပြည်ထောင်စုနိတင်ဆက်ဖို့ကကွက်အတွက် ဆရာတေးခြင်းရွီးရေလို့ သိရပါရေ။ ဇာနှစ်က ဇာကကွက်အတွက် ဇာတေးခြင်းတိကို ရွီးခလေ ပြောပြပါ။
ပြည်ထောင်စုနိတေးခြင်းတိကို နှစ်တိုင်းပိုင်ရွီးရပါရေ။ စတင်ရွီးခရေ နှစ်က ၁၉၇၉ခုနှစ် ဖြစ်ပြီးကေ ကျောက်ရိုးသိမ်း (စုပေါင်းရွီး)၊ ဒိုးယိမ်း (ကိုယ်တိုင်) ရို့ကို ရွီးပြီးကေ နောက်နှစ်တိမှာလေ့ ကြားစီကြားစပ်ရွီးခပါရေ။ အဂု ၂၀၀၉ခုနှစ်မှာ ``လှပေါင်းစုံညီ ရခိုင်မြီ´´ပြည်ထောင်စုနိယိမ်းကို နေပြည်တော်မှာ တင်ဆက်ခပါရေ။

ဆရာ့မှာ ဂီတမျိုးဆက်သားတယောက်ဟိရေလို့ သိရပါရေ။ နာမေနဲ့ ထုတ်ခရေအခွီတိကို သိချင်ပါရေ။ ဆရာစပ်ပီးရေတေးခြင်းတိ ပါပါလာ။
မောင်ကိုကိုဖြစ်ပါရေ။ သူဆိုခစွောတိက ``ဓည၀တီမှ မြောက်ဦးရွှီနန်းသို့´´စီးရီး၊ ``ကျွန်းတွင်ဇမ္ဗူ လူတွင်ရခိုင်´´စီးရီးနဲ့ ``နှစ်ကူးပန်း´´စီးရီးရို့ဖြစ်ပါရေ။ ``နှစ်ကူးပန်း´´မှာ ကိုထွန်းလှိုင်တေးခြင်းတိနဲ့ ရောဗျာလ်ထုတ်စွာပါ။ မောင်ကိုကိုတေးခြင်းအချို့ကို ကျွန်တော် စပ်ပီးခစွောဟိပါရေ။

ရခိုင်မိုနိုတေးခြင်း မပျောက်ကွယ်လားရအောင် ဇာပိုင်ထိန်းသိမ်းကတ်ရဖို့လို့ ဆရာထင်ပါလေ။
ရခိုင်မိုနိုတေးခြင်းတိ မပျောက်ကွယ်ရအောင် ရခိုင်ဂီတ၊ အဆို၊ အရွီး၊ အတီးပြိုင်ပွဲတိကို မကြာမကြာကျင်းပနိုင်ကတ်ဖို့လိုပါရေ။ တဖက်ကလေ့ ထုတ်ဝီသူတိ မနစ်နာရအောင်၊ စိတ်ဓါတ်မကျအောင် ခိုးကူးခွီ ပပျောက်ရေးကိုလေ့ အဓိကထားရပါဖို့။

ဆရာ့ပညာတိကို မျိုးဆက်အမွီခံဖို့အတွက် ပညာလာသင်ကတ်စွာတိ ဟိပါလာ။
စတီရီယိုခေတ်မစားခင်က မယ်ဒလင်၊ တယောကို သင်လာကတ်စွာဟိပါရေ။ အဂုခေတ်မှာတော့ ကျွန်တော့်အစ်ကိုသား၊ သားကြီး ထွန်းထွန်း (ဦးမြထွန်း) တယောက်ရာ မယ်ဒလင်နဲ့ တယောနဲ့ ပတ္တလားသင်နီပါရေ။ သူလေ့ နိုင်ငံတော် အဆင့် ဆိုကရေးတီးပြိုင်ပွဲမှာ အဆိုငွီနှစ်ခု၊ မယ်ဒလင် အတီးငွီနှစ်ခု၊ ကြီးတစ်ခုရဟိထားပါရေ။ နောက်တစ်ယောက်က ပုဏ္ဏးကျွန်းက အောင်နိုင်ဝင်းဖြစ်ပါရေ။ သူက နိုင်ငံတော်အဆင့် ဆိုကရေးတီ (၁၀-၁၅)မှာ အထူးဆုတစ်ဆု၊ ကြီးတဆု၊ ငွီနှစ်ဆု၊ ရွှီတစ်ဆုရဟိပြီးကေ ၂၀၀၈ခုနှစ် ၀ါသနာသျှင် (ပ)အဆင့်မှာ ငွီတစ်ဆုရဟိဖူးပါရေ။ အဂုမယ်ဒလင်ဆက်သင်နီပါရေ။

တေးခြင်းရွီးဆရာတယောက်ဖြစ်လာဖို့ ဇာတိကို ကျော်ဖြစ်ရဖို့လေး၊ သိထားရဖို့လေးကို ဗဟုသုတအဖြစ် ပြောပြပါ။
တေးရွီးဖို့အတွက် ၁။ အဆိုအားဖြင့်ဆက်နွယ်နီရေ သံစဉ်၊ ၂။ အတီးဆက်နွယ်နီရေသံစဉ်၊ ၃။ အဆို/အရွီးနှစ်ခုလုံးနဲ့ ဆက်သွယ်နီရေစာသား၊ ယင်းအချက်သုံးချက်နဲ့ အံဝင်ဂွင်ကျဖြစ်မှ တေးခြင်းတစ်ပုဒ်ဖြစ်လာပါဖို့။ ယေနဲ့တောင် တေးခြင်းကောင်းတပုဒ်ဖြစ်ဗျာလ်လို့ မပြောနိုင်ပါသိ။ ကိုယ်ဖော်ကျူးလိုရေတေးခြင်း ခေါင်းစဉ်နဲ့ဆိုရေသံနီသံထား လိုက်ဖက်ဖို့လေ့ လိုပါသိရေ။း
ဥပမာ - သူရဲကောင်းတိကို ဂုဏ်တင်ရွီးရေတေးခြင်းမှာ သဘာဝအချစ်တေးခြင်းသံစဉ်မျိုးကို ရှောင်ရှားရပါဖို့။
ယေနဲ့ တေးခြင်းရွီးဖို့ဆိုကေ ၁။ ဇာကိုမဆို ဒေါင့်မလွတ်အောင် စာဖတ်ပါ။ ၂။ ဇာတိတ်ခွီမဆို ရခိုင်ဖြစ်ဖြစ်၊ ဗမာဖြစ်ဖြစ်၊ အင်္ဂလိပ်ဖြစ်ဖြစ်၊ ကုလားဖြစ်ဖြစ်နားထောင်ပီးပါ။ ၃။ တေးခြင်းရွီးပြီးတိုင်းလေ့ ကိုယ့်စွာကိုယ်ကျီနပ်မနီဘဲ တေးရွီးတတ်တေ တခြားတေးရွီးဆရာတိကို ဆိုပြ၊ တီးဖြစ်ခိုင်းပါ။ နောက်တချက်က တေးခြင်းရွီးရေနီရာမှာ အပိုဒ်လိုက်ချိန်ခွင်သျှာကို ကြည့်ရပါရေ။ များသောအားဖြင့် ပထမ၊ ဒုတိယ၊ တတိယ စသည်အားဖြင့် စကားလုံး၊ သံစဉ်အချိန်တိကို စိစစ်ရပါရေ။ နောက်တစ်ချက်က ရသခံစားမှု မရောယှက်ဖို့လိုပါရေ။ ဥပမာ သဘာဝကောင်းကင်ကို တင်စားနီယင်း တစ်ပါဒထဲမှာဗျာလ် မြီပြင်ကိုဆင်းလိုက်၊ တောထဲကို ၀င်လိုက်၊ ကောင်းကင်ကို ပြန်တက်လိုက် မဖြစ်ဖို့လိုပါရေ။ အဂု ကျွန်တော် ပြောပြရေအချက်တိကို သတိထားကေ တေးခြင်းကောင်းတစ်ပိုဒ်ဖြစ်လာပါဖို့ဗျာလ်။

အဂု စစ်တွေကို အခြီခံပနာ ဆရာရို့ ဂီတတီးခတ်နီစွာမှာ တူရိယာအမျိုးအစားအလိုက် (မိုနိုတေးခြင်းအတွက်) ကျွမ်းကျွမ်းကျင်ကျင်တီခတ်နိုင်ရေ ဂီတပညာသျှင်စာရင်းကို ပြုစုပီးပါ။
မယ်ဒလင် - ကိုအေးထွန်း၊ ကိုကျော်သိန်းမောင်၊ ဦးကျော်လှ၊ ကိုထွန်းသိန်း၊ ဦးမြကျော်၊ ဦးထွန်းအောင်သာ
တယော - ကိုထွန်းသိန်း၊ ဦးထွန်းအောင်သာ
ပတ္တလား - ဦးမြထွန်း၊ ဦးထွန်းအောင်သာ
ပလွီ - ကိုကျော်သိန်း၊ ကျော်မင်းသန်း
ဗုံ - မောင်အုန်းခင်
ဘင်ဂျို - ဦးအေးထွန်း
မောင်းဆိုင်း - မင်းမင်းဇော်၊ ဦးအောင်ကျော်သိန်း
နှဲ - ဦးကျော်သာဦး (မင်းပြား)
စည်း/၀ါး - ဦးလှထွန်း
ကီးဘုတ် - ဦးထွန်းသိန်း၊ ဦးအောင်ကျော်သန်း၊ ရို့ ဖြစ်ကတ်ပါရေ။

တေးရွီးဆရာက တေးခြင်းရွီးပီးပြီးကေ အဆိုတော်ကို ဇာပိုင်ဆိုရဖို့လေး သင်ပီးပါသိလာ။
တေးခြင်းအသစ်အတွက် တေးခြင်း သံစဉ်နဲ့ တေးခြင်းရသပေါ်ဖို့အတွက် တေး၇ွီးစပ်မှုရသကို ဖော်ပြပြီးဆိုပြရပါရေ။

အင်တာဗျူးတစ်ခုမှာ တေးသံသျှင် ညှာစိမ်းခိုင်က အဆိုတော်အသက်စွာ တေးရွီးဆရာနဲ့ သံစဉ်ရှာသူ လက်ထဲမှာရာ ဟိပါရေ။ မိဖနဲ့တစ်ဂိုဏ်းတည်းထားသင့်ရေ ပုဂ္ဂိုလ်တိပါ လို့ ဖြီဖူးပါရေ။ ဆရာ့အမြင်ကို ပြောပြပါ။
ညှာစိမ်းခိုင် အဂုပိုင်ဖြီရေအတွက် ကျွန်တော့်ပိုင်တေးရွီးဆရာတစ်ယောက်အနီနဲ့ အလွန့်အလွန် ၀မ်းသာမိပါရေ။ ညှာစိမ်းခိုင်ကိုလေ့ ဒေပိုင်စိတ်ဟိစွာကို လေးစားဂုဏ်ပြုလိုက်ပါရေ။ ယေဒါလေ့ အတီးအမှုတ်သမား၊ audio, video စက်သမားတိ အခန်းကဏ္ဍကလေ့ အရေးကြီးစွာဗျာလ်ဖြစ်တေအတွက် မိမထားသင့်လို့ ထင်မြင်မိပါရေ။

မိုနိုရခိုင်းတေးခြင်းတိအတွက် အဂုပေါက်နီရေ တေးရွီးဥာဏ်ပူဇော်ခ ဈီးနှုန်းတိကို သိချင်ပါရေ။
တေးခြင်းအမျိုးအစားကိုလိုက်လို့ ဥာဏ်ပူဇော်ခကို ယူပါရေ။ သမရိုးကျ အချစ်သဘာဝဆိုရေ တေးခြင်းအတွက် တစ်ပိုဒ်ကို တစ်သောင်းယူပါရေ။ ယိမ်းသခြင်း၊ ဂန္ထ၀င်သခြင်းတိအတွက် တစ်ပိုဒ်ကို နှစ်သောင်းကနီ သုံးသောင်းအထိယူပါရေ။ အတ္ထုပ္ပတ္တိ၊ သမိုင်းဖြစ်စဉ်၊ ဇာတ်လမ်းသရုပ်ဖော်တေးခြင်းတစ်ခွီစာအတွက် တစ်သိန်းသုံးသောင်းကနီ တစ်သိန်း ခွဲအထိ ယူပါရေ။

တေးရွီးဆရာတစ်ယောက်ရေ ကိုယ်ရွီးရေတေးခြင်းနဲ့ပတ်သက်လို့ ဇာလောက်အထိ အကျိုးခံစားခွင့်ဟိပါလေ။ ရခိုင်မှာ စာချုပ်စာတမ်း အသုံးပြုမှုဟိကတ်ပါလာ။
တေးခြင်းကောင်းတစ်ပိုဒ်ကျော်ကြားလားကေ ရွီးစပ်တေ လူနဲ့မဆိုပါဗျာလ်။ ထုတ်ဝီသူရို့က နားလည်မှုအသိတရားနဲ့ ပီးကေတော့ခါ ရပါဖို့။ ကျွန်တော့်အနီနဲ့ ရှိနီရှိရပ်ရို့နဲ့ စာချုပ်လုပ်စွာတော့ မဟိဖူးပါ။ ယေဒါလေ့ မိုးကုတ်စက်ဝိုင်းကို ကျော်လွန်၍ ဗမာဘိုင်စကုတ်မှာ ဒါရိုက်တာ ဦးတင်ယုနဲ့ ဒါရိုက်တာ ဦးစံရွှေမောင်ရို့က ကျွန်တော်ရွီးရေတေးခြင်းတပိုဒ်ကို ယူသုံးလို့ ခွင့်ပြုကြောင်း စာချုပ်လက်မှတ်ထိုးပီးလိုက်ရဖူးပါရေ။ တေးခြင်းအတွက် ဥာဏ်ပူဇော်ခ ငွီသုံးသောင်းကျပ်ရဟိ လိုက်ပါရေ။ စာချုပ်ဆိုစွာကလေ့ နှစ်ဦးနှစ်ဖက် အပြန်အလှန်သစ္စာစောင့်သိကတ်မှ တည်စွာပါရာ။ ယေဒါလေ့ စာချုပ်တိဟိသင့်ဗျာလ်လို့ ထင်ပါရေ။

ဆရာရွီးပီးခရေတေးခြင်းတိထဲက အနှစ်ခြိုက်ဆုံး တေးခြင်းတစ်ပိုဒ်ကို ပြောပြပါ။
ပြောဖို့ခက်ခဲရေ မီးခွန်းပါ။ ယေဒါလေ့ ပရိသတ်လက်ခံလို့ ကျော်ကြားရေတေးခြင်းကို ကျွန်တော့်အောင်မြင်မှုအရဆုံးတေးခြင်းလို့ ဆိုချင်ပါရေ။ ယင်းစံအရဆိုကေ ညှာစိမ်းခိုင်ဆိုရေ ရိုးမရံစီလို့ဖြီရပါဖို့။

ဆရာနဲ့ခေတ်ပြိုင်နာမေကြီးတေးရွီးဆရာတိဟိပါသိလာ။
ဟိပါရေ။ ဆရာဒိုးမောင်၊ ဆရာအခင်ထွန်း (စစ်တွေ) ဆရာဦးမောင်သန်းနဲ့ ဆရာ ဦးမောင်သိန်းရို့ ဖြစ်ပါရေ။

ရခိုင်ပြည်က ဂီတအနုပညာသျှင်တိ၊ ရခိုင်အဆိုတော်တိကို ဇာမှာကြားချင်ပါလေ ဆရာ။
ဂီတအနုပညာလောကက ကျယ်ပြန့်ပါရေ။ စိတ်ရှည်ရပါမေ။ အတီးအမှုတ်သမားတိကို ပြောဖို့ဆိုကေ ပညာမရခင် အောက်ကျို့ခံပြီးကေ ပညာရအောင် ယူတတ်ဖို့လိုပါရေ။ ပညာရသင့်သလောက် ရလာကေ မာနဂုဏ်ကို စောင့်ထိန်းရပါမေ။ အဆိုနဲ့ပတ်သက်လို့ဆိုကေ တိတ်ခွီများများနားထောင်ပီးဗျာလ်လေ့ကျင့်ကတ်ပါ။ နာမေစကေရလာကေ ဘ၀င်မြင့်ပြီးကေ ဘ၀င်ပြဒါးတိုင် မတက်စီချင်ပါ။ ကိုယ့်မှာ ဆရာသမားဆိုစွာ တယောက်တော့ ဟိအပ်ပါရေ။

ဆရာမအားလပ်တေကြားက မီးခွန်းတိကိုဖြီပီးရေအတွက် ကကောင်းကျေးဇူးတင်ပါရေ။ ဆရာ ဂီတအနုပညာနယ်မြီမှာ အသက်ရှည်ကျန်းမာပြီး ရခိုင်လူမျိုး၈ုဏ်ဆောင်တေးခြင်းတိ ရွီးနိုင်ပါစီ။ အနုပညာသျှင်တိကို လေးစား တန်ဖိုးထားရေ အနုပညာသမား အစစ်အမှန်တိနဲ့ တွိနိုင်ပါစီလို့ မေတ္တာပို့လိုက်ပါရေ ဆရာ။

ဗဂျီးကျော်
၂၃.၃.၂၀၀၉
(၀ံသရက္ခိတ မဂ္ဂဇင်း အတွဲ (၃)၊ အမှတ် (၁)မှ ထုတ်နှုတ်တင်ပြချက်)
                                                                                       www.myomornlay.ning.com ကကူးယူထားစော်ပါ